【蘋果日報】 「松松姐姐」陳松伶今日喺新城接受薛家燕同范振鋒主持嘅《開心大派對》訪問，佢喺節目中暢談減肥經驗，半年減掉10磅，佢話：「每晚6點後唔食飯，夜晚淨係飲紅酒，老公都有用呢個方法，睡眠質素係好咗。」老公有冇有力咗﹖松松姐姐笑住話：「有心有力！」佢表示仲會多行路，試過由尖沙嘴行去何文田，佢話：「喺香港，我會坐巴士、地鐵，因為仲方便。」

提到佢最近為鄭國江演唱會擔任嘉賓，松松姐姐話：「鄭SIR有好多歌，超過100首歌，因為我嗰個年代，多數由佢填詞。」由於經常飄洋過海、搬屋，有好多專輯都冇晒，佢話：「我最想搵番第一隻黑膠碟『宵禁』、『天涯歌女』同『月兒彎彎照九州』，我諗我要CALL番我啲fans。」問到佢內衣生意，松松姐姐透露由於已上軌道，所以交由職員負責，現時主力喺北京開製作公司，已計劃明年將開拍3部網劇。