26 FEB 2018


陳松伶47歲束胸扮男人媾女  防腐靠靚湯:最拿手係花膠滋陰

【香港01娛樂】《降魔的》去年播出時好評如潮,劇集監製方俊釗新作《危城First Lady》開拍在即,仲搵埋陳松伶、陳煒、黃賢智等人演出,令唔少劇迷都表示期待。劇集今午(26日)於電視城舉行拜神儀式,以紳士造型亮相的松松姐姐一出場就話:「大家好,我係新晉演員陳松伶先生,今次我在劇中除了有很多靚衫之外,亦會出盡全力咁媾女。」


《危》將會以英國妓女連環殺手「開膛手傑克」(Jack the Ripper)為藍本,松松透露於劇中本係一名不食人間煙火、極離地的貴婦,家道中落後被迫搬到廉租屋:「但我住木屋都要high tea同繼續打扮到好高貴,真係激死。本身好優雅,但為了查案,所以就換上一身紳士打扮,方便去追逐。」


搖身一變做男人,松松自覺好靚仔,並打算將造型跟老公分享。「到正式開拍時需要束胸,應該不會太辛苦吧?我當束腰,哈哈!」再次與大台合作,松松坦言是被角色所吸引。「我而家揀劇本/作品都想有挑戰性,同埋監製有《降魔的》令我更有信心,我讀劇本有少少問題都會馬上問。」

松松透露故事圍繞2、30年代,內裏有多個造型,當中不乏靚衫靚裙,她謂:「今日個造型係參照『查理·卓別靈』,我係女版福爾摩斯,成日都破案,我從來冇做過呢啲角色,很多對白要背,之前《全職沒女》開工覺得好玩,今次就覺得嚴重困惑,唔知點先做得更加好,係一個大突破同挑戰。」